Սկանդինավյան Գրականություն

Սկանդինավյան գրականություն բաժնում ընդգրկված նյութերը մեր ընթերցողներին կծանոթացնեն Հյուսիսային Եվրոպայի երկրների մշակույթային կյանքի զարմանահրաշ էջերին: Վաղ միջնադարյան և ժամանակակից գեղարվեստական և ոչ գեղարվեստական ժանրերին, արձակ և քնարերգական չափածո ստեղծագործություններին ու հեղինակներին ներկայացնելուց առաջ նախ փոքրիկ պարզաբանում տանք սկանդինավյան լեզուների մասին: Շվեդերենը, դանիերենը և նորվեգերենը սերտ ազգակցության շնորհիվ շատ մոտ են միմյանց: Քերականական խրթին կառուցվածքի և բառապաշարի արխաիկությամբ օժտված իսլանդերենով և ֆարերերենով խոսում են բուն Իսլանդիայում և Ատլանտյան օվկիանոսի հյուսիսում տեղաբաշխված Ֆարերյան կղզիներում: Ֆիներենն ու սաամերենը առանձին լեզվական խմբի են պատկանում: Մի խոսքով ավելի հարմար է սկանդինավյան գրականությանը ծանոթանալ հայերենով, քան դեգերել միջանկյալ լեզուներով կատարված թարգմանությունների մառախլապատ անտառներում: Եվ մենք կփորձենք մեր կայքի հենց այս բաժնի միջոցով ընթերցողներին ծանոթացնել առաջին հերթին նորվեգական, իսլանդական, դանիական և այլ լեզուներով գրված ու լայն տարածում գտած գրքերին ու դրանցից կատարված հայերեն թարգմանություններին: Դե իհարկե չենք մոռանա նաև հին ու նոր ռունագրերի և անգլո-սաքսոներենի մասին, որոնց հետ ավելի մոտ ու հանգամանալից ծանոթանալուց հետո, հետաքրքրասեր ընթերցողը նախ կխճճվի թաքնագիր-նշանագրերի լաբիրինթոսում, դե իսկ հին անգլերենից առաջ Բրիտանիայում շրջանառվող անգլո-սաքսոներենը հաստատ չի կարողանա տարբերել հին իսլանդերենից: Սկանդինավյան գրականության բազմաբովանդակ էջերում կներկայացնենք բնագրերից արդեն հայերեն թարգմանված «Ավագ Էդդա» գերմանա-սկանդինավյան էպոսը, «Նորվեգական ժողովրդական ավանդազրույցներ և հեքիաթներ» պատկերազարդ գիրքը և շուտով սպասվող այլ չափազանց կարևոր գրական հուշակոթողների հայերեն թարգմանությունները, իսկ գաղտնիքները կներկայացնենք աստիճանաբար և մեծ խնամքով՝ հնարավորինս երկարացնելով սպասումի պահը... Էանում ենք երազելով...